ຄຳທຳນາຍໃນຕຳນານບຸນສົງການປີໃໝ່ລາວ

ປີນີ້ ຄືປີມະແມ ຫລື ປີຮັບມົດ,ເປັນປີສັຕຕະສົກ, ປີອະທິກະມາສ, ກົງກັບປີ ພຸດທະສັງກາດ ຫລື ພສ 2557 ກົງກັບປີ ຈຸນລະສັງກາດ ຈສ 1376 ແລະ ຈະປ່ຽນເປັນ ຈສ 1377 ໃນມື້ສັງຂານຂຶ້ນ ກົງກັບປິ ຄຣິຕ ສັງກາດ ຫລື  ຄສ 2015.

ວັນສັງຂານລ່ວງ : ວັນອັງຄານ (ມື້ກົດສັນ) ແຮມ 11 ຄ່ຳ ເດືອນ 5 , ພສ 2557 ກົງກັນວັນທີ່ 14 ເມສາ 2015 ເວລາ 14ໂມງ 24 ນາທີ 00 ວິນາທີ...ວັນສັງຂານເນົາ: ວັນພຸດ (ມື້ຮ້ວງມົດ) ແຮມ 12 ຄ່ຳ ເດືອນ 5 , ພສ 2557 ກົງກັນວັນທີ່ 15 ເມສາ 2015(ເນົາວັນດຽວ) ແລະ ວັນສັງຂານຂຶ້ນ: ວັນພະຫັດ(ມື້ເຕົ່າເສັດ) ແຮມ 13 ຄ່ຳ ເດືອນ 5 , ພສ 2557 ກົງກັນວັນທີ່ 16 ເມສາ 2015 ເວລາ 18 ໂມງ 21 ນາທີ 36 ວິນາທີ , ປ່ຽນວັນຖະເຫລີງສົກປີໃຫມ່ລາວຈຸລສັກຣາຊ ຈາກ 1376 ເປັນ 1377.

ນາງສັງຂາຣ : ປີມະແມ -ຮັບມົດ - ສັຕຕະສົກ ,ທາງຈັນທະຣະຄະຕິເປັນອະທິກະມາສ , ປົກກະຕິສຸຣະທິນ ,ທາງສຸຣິຍະຄະຕິ ກໍ່ເປັນປົກກະຕິສຸຣະທິນເໝືອນກັນ ນາມມະຫາສົງກຣານຕ໌ ນາງເທພພະທິດາທີ່ 3 ຊົງພະນາມວ່າ “ ຣາກສະເທວີ ” ຊົງພະຫຸຣັດທັດດອກບົວຫລວງ, ອາພອນປະດັບດ້ວຍແກ້ວໂມລາ(ແກ້ວລາຍ),ສະເຫວີຍໂລຫິດ(ເລືອດ)ເປັນພັກສາຫານ, ມືຂວາຊົງຕຣີສູນ(ຫອກສາມຫງ່າມ), ມືຊ້າຍຊົງທະນູ, ສະເດັດໄສຍາດ(ນອນຫລັບຕາ)ມາເທິງຫລັງວະຣະຫະ(ໝູ)ເປັນພາຫະນະ .

(ພາບໄດ້ຈາກ ອິນເຕີເນັທ)

ເກນພິຣຸນະສາຕ: ພະອາທິດເປັນອະທິບໍດີ, ນາກຫລິ້ນນ້ຳ 4 ໂຕ, ບັນດານໃຫ້ຝົນຕົກ 400 ຫ່າ, ຕົກໃນຂອບຈັກກະວານ 160 ຫ່າ, ຕົກໃນປ່າຫິມະພານ 120 ຫ່າ, ຕົກໃນມະຫາສະໝຸດ 80 ຫ່າ, ຕົກໃນມະນຸດໂລກ 40 ຫ່າ.

      ເກນທັນຍາຫານ: ຊື່ວ່າປັດສິມະ, ເຂົ້າກ້າໄຮ່ນາຈະໄດ້ 1 ສ່ວນ, ເສຍ 1 ສ່ວນ, ໂພຊະນາການ: ມີພໍສົມຄວນ, ປະຊາຊົນຈະສຸກແດ່.... ທຸກແດ່.... ປະປົນກັນ...ຯ 

     ຜະລາມັດສະມັງສາຫານ: ຜົນລະໄມ້ຈະມີພໍສົມຄວນ ຯ. 

    ຣຸກຂະຊາດ: ໄມ້ງິ້ວເປັນພະຍາ ບ້ານເມືອງຈະສະຫງົບສຸກດີ ແຕ່ຟ້າຝົນບໍ່ດີປານໃດ, ຈະມີລົມແຮງ,         ການເຮັດໄຮ່ນາ: ນາລຸ່ມ ແລະ ນາໂພນຈະດີສົມສ່ວນກັນ.

    ເກນກາລະໂຍກ: ວັນພຸດເປັນທຸງໄຊ, ວັນອັງຄານເປັນອະທິບໍດີ, ວັນອາທິດເປັນອຸບາດ, ວັນພະຫັດເປັນໂລກະວິນາດ...ຯ.

(ພາບໄດ້ຈາກ ອິນເຕີເນັທ)

 ປີນີ້ ສັງຂານໄປ(ລ່ວງ)ວັນອັງຄານ(14 ເມສາ 2015) ຄົນບູຮານໄດ້ທຳນາຍໄວ້ວ່າ: “ ສັງຂານໄປວັນອັງຄານຈະມັກເກີດອັນຕະລາຍຂຶ້ນກາງເມືອງເຊັ່ນ: ໄຟໄໝ້,ໂຈນປຸ້ນຊິງຊັບ ແລະ ຈະມັກມີການລະບາດຂອງ ພະຍາດທີ່ຮ້າຍແຮງກັບປະຊາຊົນເປັນອັນມາກ ”

ປີນີ້ວັນເນົາກົງກັບວັນພຸດ(15 ເມສາ 2015)ຄົນບູຮານໄດ້ທຳນາຍໄວ້ວ່າ: “ ຜົນລະໄມ້ຈະແພງ ຄົນທັງຫລາຍຈະໄດ້ຮັບຄວາມເດືອດເນື້ອຮ້ອນໃຈໃນການດຳລົງຊີບ ”

ປີນີ້ສັງຂານຂຶ້ນວັນພະຫັດ (16 ເມສາ 2015)ຄົນບູຮານໄດ້ທຳນາຍໄວ້ວ່າ: “ ສຳມະນະພາມ(ຜູ້ມີສິນທຳ)ຈະປະຕິບັດຊອບດ້ວຍທຳອັນປະເສີດ”

ເດືອນຫ້າ (ບຸນປີໃຫມ່ລາວ)
ເດືອນນີ້(ເມສາ)ເປັນເດືອນທີ່ຊາວລາວທັງຫລາຍ ໄດ້ຮ່ວມກັນສະເຫລີມສະຫລອງບຸນກຸດສົງການ ຫຼື ບຸນປີໃໝ່ລາວ ຢ່າງຄຶກຄື້ນມ່ວນຊື່ນ. ຈຸດພິເສດອັນໂດດເດັ່ນຂອງບຸນກຸດສົງການ ຫຼື ບຸນປີໃໝ່ລາວນັ້ນແມ່ນ: ມີການສະຫລອງທີ່ຫລາກຫລາຍ ແລະ ທີ່ຂາດບໍ່ໄດ້ນັ້ນກໍ່ຄືການຫົດສົງນ້ຳໃຫ້ພອນກັນ ດ້ວຍນ້ຳທີ່ສະອາດອັນເປັນສາເຫດເຮັດໃຫ້ເອີ້ນບຸນນີ້ແບບງ່າຍໆວ່າ: ບຸນຫົດນ້ຳ.


(ພາບໄດ້ຈາກອິນເຕີເນັທ)
ການຂຶ້ນປີໃໝ່ສຳລັບຊາວລາວນັ້ນ ມັນກົງກັບການປ່ຽນປີ ຈສ ຫຼື ຈຸນລະສັກລາດ ເຊິ່ງຄົນລາວໄດ້ນັບຖືມາຕັ້ງ ແຕ່ຍຸກສະໄໝລ້ານຊ້າງຕອນຕົ້ນພຸ້ນ ເວລານັ້ນຊາວລ້ານນາກໍ່ເຄີຍໃຊ້ປີ ຈສ. ຄືກັນກັບຊາວລ້ານຊ້າງ ຫລື ຊາວລາວ.(ປີນີ້ ຄສ. 2015 ກົງກັບປີ ຈສ. 1376 ແລະ ຈະປ່ຽນເປັນ ຈ.ສ 1377 ມື້ສັງຂານຂຶ້ນ) ການສະຫຼອງປີ ໃໝ່ລາວແຕ່ບູຮານນັ້ນ ເພິ່ນຈະຈັດຫາເຄື່ອງຂອງຕ່າງໆເພື່ອໄຫວ້ ຫຼື ເພື່ອສັກາລະຜີຟ້າຜີແຖນ, ແຕ່ພາຍຫລັງທີ່ໄດ້ຮັບເອົາພະພຸດທະສາສນາເຂົ້າມາໃນດິນແດນລາວແລ້ວການຈັດງານສະຫລອງ ປີໃໝ່ລາວຈຶ່ງໄດ້ປັບປ່ຽນໄປຕາມ ຍຸກສະໄໝທີ່ແທດເໝາະກັບລັກສະນະຂອງຊາວພຸດ.

ໃນປັດຈຸບັນ ຊາວລາວສ່ວນໜຶ່ງຍັງເຂົ້າໃຈຜິດວ່າປີໃໝ່ລາວ(ກຸດສົງການ) ເປັນເວລາຂອງການປ່ຽນ ພ.ສ. (ພຸດທະສັກກະລາດ)ຫຼື ປີພຸດ, ແຕ່ຄວາມຈິງແລ້ວ ມັນແມ່ນເວລາປ່ຽນແປງຂອງປີ ຈຸນລະສັກກະລາດ ຫຼື ຈ.ສ. ນັ້ນເອງ ແລະ ການຈັດງານສະເຫຼີມສະຫລອງ ເຮົາມັກເອີ້ນບຸນນີ້ວ່າ "ບຸນປີໃໝ່ລາວ ຫຼື ກຸດສົງການປີໃໝ່ລາວ".

ການຈັດສະຫລອງບຸນປີໃໝ່ລາວນີ້ ຈະໃຊ້ຫລັກການຄຳນວນຕາມໂຫລາສາດບູຮານລາວ, ຖ້າສັງເກດໃຫ້ດີແລ້ວ ເຮົາຈະເຫັນວ່າ ບໍ່ໄດ້ອີງຕາມປະຕິທິນຈັນທະຣະຄະຕິ (ຄືບໍ່ອີງຕາມມື້ຂຶ້ນ-ມື້ແຮມ ແຕ່ຢ່າງໃດ) ແຕ່ຫາກອີງຕາມຫລັກຄຳນວນດັ່ງກ່າວທີ່ສືບທອດກັນມາ. ໂດຍທົ່ວໄປແລ້ວຈະມັກຕົກໃນລະຫວ່າງວັນທີ 13-14-15 ເມສາ ຫຼື 14-15-16 ເມສາ (ວັນທີ 13-14-15-16 ເມສາ ໃນປີອະທິກະຈຸຣະທິນ ຫຼື ປີທີ່ມີ 366 ມື້). ໃນເວລາ 3 ມື້ ຫຼື 4 ມື້ ນີ້, ມື້ທຳອິດຈະເປັນ ວັນສັງຂານລ່ວງ, ມື້ຕໍ່ໆມາຈະເປັນວັນເນົາ(ຖ້າເປັນປີທີ່ມີ 366 ມື້ ຈະມີວັນເນົາ 2 ມື້ຕໍ່ກັນ) ແລະ ມື້ສຸດທ້າຍຈະເປັນວັນສັງຂານຂຶ້ນ(ມື້ຂຶ້ນປີໃໝ່).

ແຕ່ທີ່ພິເສດກວ່າໝູ່ແມ່ນຢູ່ແຂວງຫລວງພະບາງ ເພາະເພິ່ນມີການອັງເຊີນເອົາອົງພຣະພຸດທະລາວັນ (ພຣະບາງ) ອອກໃຫ້ມວນຊົນໄດ້ສັກາລະບູຊາ ແລະ ຫົດສົງ. ຂະບວນແຫ່ພະບາງນີ້ເອີ້ນວ່າ ແຫ່ຫວໍ່ ອັນປະກອບມີຂະບວນແຫ່ອົງພຣະບາງ, ປູ່ເຍີ-ຍ່າເຍີ, ພຣະສົງສາມະເນນ, ພຸດທະຄຳພີ, ຂະບວນນາງແກ້ວ, ຕົວລະຄອນໃນເລື່ອງພະລັກ-ພະລາມ, ຂະບວນມະໂຫລີ-ປີ່ພາດ, ຂະບວນແຫ່ສຽນ(ຫົວ)ທ້າວກະບິນລະພົມ, ນາງສັງຂານ, ຂະບວນບ່າວສາວ ແລະ ຂະບວນມະຫາຊົນຢ່າງອະ ເນກອະນັນຕາທີ່ຍິ່ງໃຫຍ່ ເຊິ່ງນັບວ່າ ເປັນພິທີແຫ່ທີ່ງົດງາມ ແລະ ຍິ່ງໃຫຍ່ທີ່ສຸດ.

(ພາບໄດ້ຈາກ ອິນເຕີເນັທ)
ວັນສັງຂານຕ໌ຂຶ້ນ: ເປັນມື້ຂຶ້ນປີໃໝ່ລາວ ແລະ ປີຈຸນລະສັກກະລາດ ຈະເລື່ອນຕົວເລກຂຶ້ນອີກໜຶ່ງປີໃນມື້ນີ້(ຈາກປີ ຈຸນລະສັກກະລາດ 1376 ເປັນ 1377). ພ້ອມດຽວກັນກໍເປັນມື້ສຸດທ້າຍຂອງການສະຫລອງປີໃໝ່ລາວ; ມື້ວັນສັງຂານຂຶ້ນ ຫລື ມື້ຂຶ້ນປີໃໝ່ນີ້ຍັງຖືເປັນວັນໂຮມຍາດຕິພີ່ນ້ອງ, ຊາວລາວຈະຖືເອົາໂອກາດນີ້ ເປັນການສົມບັດສົມມາຜູ້ມີພະຄຸນຂອງຕົນ ອັນມີ ພໍ່-ແມ່, ຜູ້ເຖົ້າຜູ້ແກ່ປະຈຳວົງຕະກູນ ແລະ ບຸກຄົນທີ່ເຮົາເຄົາລົບ.

ການສົມມາ ຄືການຍອມຮັບສຳນຶກຜິດ ໃນສິ່ງທີ່ຕົນໄດ້ລະເມີດ, ລ່ວງເກີນ ຫຼື ປະພຶຕຜິດຕໍ່ບຸກຄົນ ທີ່ຢູ່ສູງກວ່າຕົນ ບໍ່ວ່າຈະດ້ວຍ ກາຍ,ວາຈາ,ໃຈ ກໍ່ຕາມ. ໃນພິທີນີ້ ບັນດາລູກຫລານຈະ ແຕ່ງຂັນຫ້າ ເພື່ອຂໍຂະມາພໍ່ແມ່, ຜູ້ເຖົ້າຜູ້ແກ່ ແລະ ບຸກຄົນທີ່ຕົນເຄົາລົບ ພ້ອມທັງຂໍລະໂທດ ອັນຈະເປັນບາບ ເປັນກໍາໃຫ້ແກ່ຕົນໃນພາຍພາກໜ້າ ແລ້ວຈາກນັ້ນກໍຂໍຫົດສົງລ້າງສ່ວຍພວກເພິ່ນ. ກຸສົນອຸບາຍນີ້ ຄົນບູຮານໄດ້ໃຫ້ຄວາມໝາຍໄວ້ 2 ຢ່າງຕົ້້ນຕໍຄື:

1) ການຮູ້ຕື່ນດ້ວຍສຳນຶກຂອງຕົນເອງ ຕໍ່ການກະທຳທີ່ອາດເປັນບາບ-ເປັນກຳ ຈະຖືເປັນການລ້າງບາບລ້າງກຳທີ່ດີທີ່ສຸດ, ທັງໄດ້ຮັບການໃຫ້ອະໄພໂທດ ແລະ ການເຂົ້າສູ່ການດຳເນີນຊີວິດໃນປີໃໝ່ຢ່າງໃສສະອາດ.

2) ເປັນໂອກາດທີ່ຈະຕັກເຕືອນຕົນເອງວ່າ: ໃນເຮືອນຊານທີ່ຕົນອາໄສຢູ່ນັ້ນບໍ່ມີພະອົງໃດຈະສັກສິດປູນປານພະອໍລະຫັນຜູ້ເປັນບຸບຜະກອນ ຫລື ບຸບຜະກາລີ ຫຼື ພໍ່ແມ່ ທີ່ເປັນຜູ້ເບິ່ງແຍງ, ລ້ຽງດູເຮົາມາ ແຕ່ມື້ເກີດ

ພ້ອມດຽວກັນນີ້, ຜູ້ທີ່ຢູ່ໃນວົງການສິນລະປະກໍາ(ນາດຕະສິນ ຫລື ນັກຟ້ອນ, ນັກດົນຕຣີ, ຊ່າງແຕ້ມ, ຊ່າງຄວັດ, ຊ່າງປັ້ນ, ນັກກະວີ, ນັກແຕ່ງ, ນັກສະແດງ, ນັກປະດິດ ແລະອື່ນໆ) ກໍຈະພ້ອມກັນມາເຕົ້າໂຮມເພື່ອສະແດງຄວາມຮູ້ບຸນຄຸນຕໍ່ຄຸນຄູບາອາຈານ ເຊິ່ງເປັນປະເພນີໃຫ້ລູກຫລານໄດ້ສືບທອດຮັກສາສືບຕໍ່ກັນມາ.ໃນພິທີນີ້, ເຄື່ອງບູຊາແບບລາວເດີມຈະໄດ້ແກ່: ໝາກພ້າວ-ກ້ວຍຫອມ, ຄຳໝາກ, ຢາເສັ້ນ, ເຄື່ອງຫອມຕ່າງໆ ແລະ ດອກໄມ້ຂາວນາໆພັນ. ອົງປະທານຕົວແທນຄູບາອາຈານແມ່ນປູ່ລືສີ ແລະ ອົງພະຄະເນດ ພ້ອມດ້ວຍຫົວໂຂນຕົວລະຄອນໃນວັນນະກໍາເລື່ອງຕ່າງໆ.

ຂອບໃຈທີ່ອ່ານ
(ຂໍ້ມູນຈາກ: ປຶ້ມໂຫຣາສາດລາວ, ການຄຳນວນຂອງພຣະອາຈານມະຫາບົວຄຳ ສາລິບຸດ ແລະ ອື່ນໆ)

ການປະລອງປັນຍາຄືທີ່ມາຂອງນາງສັງຂານ

(ພາບຈາກ: ອິນເຕີເນັທ)

ຄວາມເປັນມາຂອງນາງສັງຂານ (ປີໃໝ່ລາວ) ເກີດຂຶ້ນມາດົນແລ້ວ ໂດຍມີເລື່ອງເລົ່າສືບຕໍ່ກັນມາວ່າ: ພະຍາກະບິນລະພົມ ທ້າສະໝອງລອງປັນຍາ ກັບທ່ານນັກປາດຜູ້ຮຽນຈົບໄຕເພດ(ຄວາມຮູ້ຂັ້ນສູງສາມຢ່າງ ໂຫລາສາດ, ຄຸລຸສາດ ແລະ ພາສາສາດ) ຄື:ທຳມະບານກຸມມານ....

ລາຍລະອຽດອ່ານໄດ້ຕາມລິ້ງລຸ່ມນີ້ເດີ້

ກົດອ່ານບ່ອນນີ້ໄວໆ

ຂອບໃຈ

ແດ່...60 ປິ ພັກປະຊາຊົນປະຕິວັດລາວ

ຄຳນັບຊົມເຊີຍວັນສ້າງຕັ້ງພັກປະຊາຊົນປະຕິວັດລາວ
ຄົບຮອບ 60 ປີ ຢ່າງສຸດໃຈ(22 ມີນາ 1955 - 22 ມີນາ 2015)

ກ່ອນຫນ້ານີ້ 60 ປີ ໂດ­ຍ­ອີງໃສ່ຄວາມ­ຮຽກຮ້ອງຕ້ອງ­ການ­ຂອງ­ການປະ­ຕິວັດ­ລາວ ໂດຍສະ­ເພາະ­ແມ່ນ­ພາ­ລະ­ກິດ­ຕໍ່ຕ້ານ­ຂອງປະ­ຊາ­ຊົນເຮົາ ທີ່ພວມ­ດໍາເນີນໄປຢ່າງ­ຟົດເດືອດ ແລະ­ ເປັນຂະບວນນັ້ນ ວັນ­ທີ 22 ມີນາ 1955 ພັກປະ­ຊາ­ຊົນ­ລາວ ຊຶ່ງແມ່ນ­ພັກປະ­ຊາ­ຊົນປະ­ຕິວັດ­ລາວໃນ­ປັດ­ຈຸບັນ ໄດ້­ຮັບ­ການສ້າງ­ຕັ້ງ­ຂຶ້ນຢ່າງເປັນ­ທາງ­ການ ໂດຍ­ສືບ­ທອດ­ພາ­ລະ­ກິດ­ອັນ­ມີກຽດສະ­ຫງ່າ­ຂອງ­ພັກ­ກອມ­ມູນິດ­ອິນ­ດູຈີນ ຮັບເອົາ­ພາ­ລະ­ກໍາ­ປະ­ຫວັດ­ສາດ­ອັນແສນຫຍຸ້ງ­ຍາກ­ລໍາບາກ ແຕ່ສະ­ຫງ່າ­ລາ­ສີທີ່­ສຸດແຫ່ງ­ການ­ນໍາ­ພາ­ຂະ­ບວນ­ການ­ຕໍ່­ສູ້ຂອງປະ­ຊາ­ຊົນ­ລາວ. 

ການ­ກໍາເນີດເກີດ­ຂຶ້ນ­ຂອງ­ພັກປະ­ຊາ­ຊົນປະ­ຕິວັດ­ລາວ ແມ່ນເຫດ­ການ­ອັນ­ຍິ່ງໃຫຍ່ ແລະ­ ສໍາ­ຄັນ­ທີ່­ສຸດ ໃນປະ­ຫວັດ­ສາດ­ຂອງ­ຊາດເຮົາ ເປັນ­ຂີດຫມາຍແຫ່ງ­ບາດກ້າວຂະ­ຫຍາຍ­ຕົວໃຫມ່ຂອງ­ພາ­ລະ­ກິດປະ­ຕິວັດ­ຂອງປະ­ຊາ­ຊົນ­ລາວ ແລະ­ ປະ­ຫວັດ­ສາດແຫ່ງ­ການ­ຕໍ່­ສູ້ຂອງປະ­ຊາ­ຊົນ­ລາວ ໄດ້­ຕິດແຫນ້ນ­ກັບປະ­ຫວັດ­ສາດແຫ່ງ­ການເຕີບໃຫຍ່ຂະ­ຫຍາຍ­ຕົວຂອງ­ພັກເຮົາ ຕັ້ງແຕ່ເວລານັ້ນເປັນ­ຕົ້ນ­ມາ. 

ນັບແຕ່ມື້ທີ່­ກໍາເນີດ­ຂຶ້ນ ພັກເຮົາໄດ້­ຢືນ­ຢູ່­ຕໍ່ຫນ້າການ­ທົດ­ສອບ­ອັນຮ້າຍແຮງ­ທີ່­ສຸດ ຍ້ອນວ່າມັນແມ່ນໄລຍະເວລາ­ ທີ່ພວກລ່າເມືອງ­ຂຶ້ນແບບໃໝ່ ໄດ້ເຂົ້າມາ­ປ່ຽນແທນ­ພວກລ່າເມືອງ­ຂຶ້ນແບບເກົ່າ­ທີ່ໄດ້­ຖືກປະ­ລາໄຊໄປແລ້ວ. ພວກລ່າເມືອງຂຶ້ນແບບໃຫມ່ ໄດ້­ດໍາເນີນ­ສົງ­ຄາມ­ຮຸກ­ຮານ­ທີ່­ມີລັກສະ­ນະ­ລ້າງ­ຜານ ດ້ວຍ­ກໍາ­ລັງ­ອັນໃຫຍ່ຫລວງ ແລະ­ ພາ­ຫະ­ນະ­ສົງ­ຄາມ­ທີ່­ທັນສະ­ໄໝ ສົມ­ທົບ­ກັບ­ການ­ນໍາໃຊ້­ກົນ­ອຸບາຍ­ທີ່ໂຫດຫ້ຽມ ເພື່ອຫວັງ­ດັບ­ມອດ­ກໍາ­ລັງປະ­ຕິວັດ­ທີ່­ຍັງອ່ອນນ້ອຍໃນເວລານັ້ນ. 

ພາຍໃຕ້­ການ­ນໍາ­ພາ­ຂອງ­ພັກ ຂະ­ບວນ­ການ­ຕໍ່­ສູ້ປະ­ຕິວັດ­ຂອງປະ­ຊາ­ຊົນ­ລາວ ຍິ່ງໄດ້ເຕີບໃຫຍ່ຂະ­ຫຍາຍ­ຕົວ ປະຊາຊົນ­ລາວບັນ­ດາເຜົ່າໄດ້­ສາມັກ­ຄີກັນ ເປັນ­ຈິດຫນຶ່ງໃຈດຽວຢູ່ອ້ອມຂ້າງ­ພັກ ພາຍໃຕ້ແນວໂຮມ­ກູ້­ຊາດ­ອັນ­ກວ້າງ­ຂວາງ ດໍາເນີນ­ການ­ຕໍ່­ສູ້­ອັນລະ­ອິດລະ­ອ້ຽວຍືດເຍື້ອຍາວນານ ພາຍໃຕ້­ຄັນ­ທຸງ­ຊາດ ປະ­ຊາ­ທິປະ­ໄຕ ພັກເຮົາໄດ້ຫມູນໃຊ້ຢ່າງຄ່ອງແຄ້ວ ແລະ­ ສົມ­ທົບແໜ້ນລະ­ຫວ່າງ­ການ­ຕໍ່­ສູ້ດ້ວຍ­ອາວຸດ­ກັບ­ການ­ຕໍ່­ສູ້­ທາງດ້ານ­ການ ເມືອງ, ການຕ່າງປະ­ເທດ ແລະ­ ດ້ານ­ກົດໝາຍ­ສົມ­ທົບຢ່າງແໜ້ນແຟ້ນລະ­ຫວ່າງ­ກໍາ­ລັງແຮງ­ຂອງ­ຊາດ ກັບ­ກໍາ­ລັງແຮງ­ຂອງ­ການຮ່ວມ­ສໍາ­ພັນ­ສູ້­ຮົບລະ­ຫວ່າງ ລາວ-ຫວຽດ­ນາມ ແລະ­ ກໍາ­ປູເຈຍ ກັບ­ກໍາ­ລັງແຮງ­ຂອງ­ຍຸກສະ­ໄຫມ ຍາດແຍ່ງ­ຄວາມເປັນໃຈການສະ­ຫນັບສະ­ຫນູນຊ່ວຍເຫລືອຈາກເພື່ອນ­ມິດ­ສາກົນຢ່າງ­ກວ້າງ­ຂວາງ ສ້າງ­ກາ­ລະ­ໂອກາດ ແລະ­ ກໍາແຫນ້ນ­ກາ­ລະ­ໂອກາດ ໃນ­ການ­ຕໍ່­ສູ້­ຍາດເອົາໄຊຊະ­ນະ­ ເປັນແຕ່ລະ­ພາກສ່ວນ ກ້າວໄປສູ່­ການ­ຍາດເອົາໄຊຊະ­ນະ­ຢ່າງ­ສົມ­ບູນ ດ້ວຍ­ການ­ລຸກ­ຮື້­ຂຶ້ນ ແລະ­ ປົດປ່ອຍປະ­ເທດ­ຊາດຢ່າງ­ສົມ­ບູນ ສະ­ຖາ­ປະ­ນາ ສາ­ທາ­ລະ­ນະ­ລັດ ປະ­ຊາ­ທິປະ­ໄຕ ປະ­ຊາ­ຊົນ­ລາວ ຂຶ້ນໃນ­ວັນ­ທີ 2 ທັນ­ວາ 1975 ອັນໄດ້ເຮັດໃຫ້ລະ­ບອບ­ລາ­ຊາ­ທິປະ­ໄຕ ແລະ­ ແອກ­ຄອບ­ຄອງ­ຂອງ­ຈັກກະ­ພັດ­ຢູ່ປະ­ເທດເຮົາໄດ້­ສິ້ນ­ສຸດ­ລົງ;ໄຂສັງ­ກາດໃໝ່ສັງ­ກາດແຫ່ງເອກະ­ລາດ­ອິດສະ­ຫລະ­ພາບ ແລະ­ ວັດທະ­ນາ­ຖາວອນ­ຂອງ­ຊາດເຮົາ ກ້າວເຂົ້າ­ສູ່ໄລຍະ­ໃຫມ່ຂອງ­ການປະ­ຕິວັດ ພັກເຮົາໄດ້­ນໍາ­ພາ­ປວງ­ຊົນ­ລາວທັງ­ຊາດ ດໍາເນີນ­ພາ­ລະ­ກິດ­ປົກ­ປັກ­ຮັກ­ສາ ແລະ­ ສ້າງ­ສາ­ປະ­ເທດ­ຊາດ ເຖິງວ່າໃນ­ບາດ ກ້າວເບື້ອງ­ຕົ້ນຈະ­ປະ­ສົບ­ກັບ­ການ­ທົດ­ສອບໃຫມ່ ທີ່­ມີຄວາມຫຍຸ້ງ­ຍາກ ແລະ­ ຂ້ຽວຂາດ­ທີ່­ສຸດ ແຕ່­ພັກເຮົາກໍໄດ້ເດັດດ່ຽວນໍາ­ພາ ແລະ­ ຍາດໄດ້ໄຊຊະ­ນະ­ອັນໃຫຍ່­ຫຼວງ ທີ່­ມີລັກສະ­ນະ­ເປັນ­ພື້ນ­ຖານຫນັກແຫນ້ນໃນແຕ່ລະ­ດ້ານ ອັນ­ສໍາ­ຄັນແມ່ນ­ພວກເຮົາ­ສາມາດ­ທັບມ້າງໄດ້­ບັນ­ດາກົນ­ອຸບາຍມ້າງເພທໍາ­ລາຍ­ຂອງ­ສັດ­ຕູ ແລະ­ ອິດ­ທິກໍາ­ລັງ­ປໍລະ­ປັກ­ລົງໄດ້ຢ່າງ­ສິ້ນເຊີງ ສາມາດ­ປົກ­ປັກ­ຮັກ­ສາເອກະ­ລາດ ອະ­ທິປະ­ໄຕ ແລະ­ ຜືນແຜ່ນ­ດິນ­ອັນ­ຄົບຖ້ວນໄວ້ໄດ້ຢ່າງຫມັ້ນ­ຄົງ ສາມາດ­ຮັບປະ­ກັນ­ຄວາມສະ­ຫງົບ­ຄວາມເປັນລະ­ບຽບ­ຮຽບຮ້ອຍ ແລະ­ ຄວາມ­ປອດໄພຢູ່ໃນ­ທົ່ວສັງ­ຄົມ ໄດ້ໂດຍ­ພື້ນ­ຖານ ດໍາເນີນ­ການ­ຮໍາບາດແຜສົງ­ຄາມ ຟື້ນ­ຟູການຜະ­ລິດຂະ­ຫຍາຍ­ວັດທະ­ນະ­ທໍາ ປົວແປງ ແລະ­ ປັບ­ປຸງ­ຊີວິດ­ການເປັນ­ຢູ່ຂອງປະ­ຊາ­ຊົນ­ບັນ­ດາເຜົ່າ ໃຫ້ເຂົ້າ­ສູ່ຄວາມ­ປົກກະ­ຕິເທື່ອລະ­ກ້າວ. 

ໃນ­ຊຸມ­ປີແຫ່ງ­ການ­ນໍາ­ພາ ພາ­ລະ­ກິດປ່ຽນແປງໃຫມ່ ນັບແຕ່­ມື້ເລີ່ມ­ຕົ້ນ­ມາເຖິງ­ປັດ­ຈຸບັນ ເຖິງວ່າ­ພວກເຮົາຍັງ­ມີຄວາມຫຍຸ້ງ­ຍາກ­ຫຼາຍດ້ານສະ­ພາບ­ການ­ຂອງໂລກ ແລະ­ ພາກ­ພື້ນຈະ­ຜັນແປໄປຢ່າງ­ສັບ­ສົນ ແລະ­ ໄວວາສັດ­ຕູ ແລະ­ ອິດ­ທິກໍາ­ລັງ­ປໍລະ­ປັກ­ຍັງ­ຄົງ­ບໍ່­ລົດລະ­ໃນ­ການເຄື່ອນໄຫວມ້າງເພທໍາ­ລາຍ­ພັກ ຈໍາກັດ­ຂັດ­ຂວາງຖ່ວງ­ດຶງ­ບາດກ້າວເດີນ­ຂອງປະ­ເທພາ­ລະ­ກິດປ່ຽນແປງໃຫມ່ ແລະ­ ມາ­ຮອດ­ປັດ­ຈຸບັນ ກໍສາມາດ­ບັນ­ລຸໄດ້ຫມາກ­ຜົນທີ່­ມີລັກສະ­ນະ­ຫນັກແຫນ້ນ­ຕໍ່ເນື່ອງ ແລະ­ ເປັນ­ພື້ນ­ຖານ­ຫຼາຍປະ­ການ ໃນ­ນີ້ເສດຖະ­ກິດໄດ້­ຮັບ­ການ­ພັດທະ­ນາໃຫ້ຂະ­ຫຍາຍ­ຕົວດ້ວຍ­ຈັງ­ຫວະ­ທີ່ໄວຂຶ້ນ ສະ­ຖຽນລະ­ພາບ­ທາງດ້ານ­ການເມືອງ­ມີຄວາມຫນັກແຫນ້ນ ແລະ­ ຫມັ້ນ­ຄົງ ບົດ­ບາດ­ຊື່­ສຽງ ແລະ­ ຄວາມເຊື່ອຫມັ້ນ­ຂອງເພື່ອນ­ມິດ­ສາກົນ ຕໍ່ ສປປ ລາວ ໄດ້­ຮັບ­ການເປີດ­ກວ້າງ ແລະ­ ເຊີດ­ຊູຂຶ້ນຢ່າງຈະ­ແຈ້ງ ຊຶ່ງ­ທັງຫມົດເຫຼົ່ານີ້ ໄດ້ເຮັດໃຫ້ປະ­ຊາ­ຊົນ­ລາວບັນ­ດາເຜົ່າ ມີຄວາມເຊື່ອຫມັ້ນ­ຕໍ່­ບົດ­ບາດ ແລະ­ ຄວາມ­ສາມາດໃນ­ການ­ນໍາ­ພາ­ຂອງ­ພັກເຮົານັບ­ມື້ຫນັກແຫນ້ນ. 

ເມື່ອພວກເຮົາ­ຫວນ­ຄືນເບິ່ງຕະ­ຫຼອດໄລຍະ­ເວລາ 60 ປີທີ່ຜ່ານ­ມາ ພວກເຮົາຍິ່ງ­ມີຄວາມເອກອ້າງທະ­ນົງໃຈ ແລະ­ ເຫັນແຈ້ງວ່າ ພັກເຮົາໄດ້ປະ­ຕິບັດ­ພາ­ລະ­ບົດ­ບາດ­ຂອງ­ຕົນຢ່າງ­ສົມ­ກຽດ ໄດ້ຮັບ­ຄວາມ­ຮັກແພງ ແລະ­ ຄວາມເຊື່ອຖືຈາກປະ­ຊາ­ຊົນ­ບັນ­ດາເຜົ່າ ຍາມໃດ­ກໍໄດ້­ຍົກ­ສູງ­ຈິດໃຈຕໍ່­ສູ້­ອັນກ້າແກ່ນ ເດັດ­ຂາດບໍ່ຍອມ­ຈໍານົນ ແລະ­ ຍາມໃດ­ກໍມີຄວາມ­ບໍລິສຸດ­ຜຸດຜ່ອງ­ຕໍ່­ຜົນປະ­ໂຫຍດ ­ຂອງ­ຊົນ­ຊັ້ນ ແລະ­ ຂອງ­ຊາດເຮົາ­ຢູ່ສະ­ເຫມີ ພັກເຮົາບໍ່­ມີວັດ­ຖຸປະ­ສົງ­ອື່ນໃດ ນອກ­ຈາກເຮັດ­ທຸກ­ສິ່ງ­ທຸກຢ່າງເພື່ອໃຫ້ປະ­ຊາ­ຊົນໄດ້­ຢູ່­ດີກິນ­ດີ ມີຄວາມ­ຜາ­ສຸກ ແລະ­ ປະ­ເທດ­ຊາດ­ມີຄວາມ­ຮັ່ງ­ມີ ເຂັ້ມແຂງ ສັງ­ຄົມ­ມີຄວາມ­ສີວິໄລ ແລະ­ ຍຸຕິທໍາ.

ພຶດ­ຕິກໍາໃນຕະ­ຫຼອດໄລຍະ­ຜ່ານ­ມາ ໄດ້­ຢັ້ງ­ຢືນໃຫ້ເຫັນຢ່າງຈະ­ແຈ້ງວ່າ: ພັກເຮົາເປັນ­ປັດໄຈພື້ນ­ຖານ­ທີ່­ຕັດ­ສິນກວ່າ­ຫມູ່ ຕໍ່­ຜົນ­ສໍາເລັດ­ຂອງ­ການປະ­ຕິວັດ­ຢູ່ປະ­ເທດເຮົາ. ໃນ­ປັດ­ຈຸບັນ­ນີ້ ພັກເຮົາ­ພວມ­ສືບ­ຕໍ່­ນໍາ­ພາການ­ຈັດ­ຕັ້ງປະ­ຕິບັດແນວທາງປ່ຽນແປງໃຫມ່ ທີ່ໄດ້­ຜັນຂະ­ຫຍາຍ­ມາເປັນ­ອັນລະ­ອຽດ ໂດຍຜ່ານມະ­ຕິກອງປະ­ຊຸມໃຫຍ່ ຄັ້ງ­ທີ IX ຂອງ­ພັກ ໂດຍສະເພາະວຽກງານ 4 ບຸກທະລຸ ຕິດພັນກັບວຽກງານ 3 ສ້າງ ຊຶ່ງແມ່ນ­ພາ­ລະ­ກິດ­ອັນຫນັກຫນ່ວງ ແລະ­ ເຕັມໄປດ້ວຍ­ສິ່ງທ້າ­ທາຍ­ຂອງໄລຍະ­ໃຫມ່ຍິ່ງ­ກວ່າເວລາໃດ. ດັ່ງນັ້ນ ພັກເຮົາຍັງຈະ­ຕ້ອງໄດ້ສືບ­ຕໍ່ເສີມຂະ­ຫຍາຍ­ທາດແທ້­ມູນເຊື້ອອັນ­ດີງາມ­ຂອງ­ຕົນ ເພື່ອເຮັດ­ຫຼ້ອນ­ພາ­ລະ­ກໍາ­ປະ­ຫວັດ­ສາດ­ອັນ­ຍິ່ງໃຫຍ່ຂອງ­ຕົນ ຊຶ່ງໃນສະ­ເພາະ­ຫນ້ານີ້ ແມ່ນຈະ­ຕ້ອງເຮັດ­ທຸກ­ສິ່ງ­ທຸກຢ່າງ ເພື່ອເຮັດໃຫ້ປະ­ຊາ­ຊົນ­ບັນ­ດາເຜົ່າ­ຫຼຸດ­ພົ້ນ­ອອກ­ຈາກ­ຄວາມ­ທຸກ­ຍາກ ປະ­ເທດ­ຊາດຫລຸດ­ພົ້ນ­ອອກ­ຈາກ­ຄວາມດ້ອຍ­ພັດທະ­ນາ. ພວກເຮົາມີຄວາມເຊື່ອຫມັ້ນຢ່າງ­ຕາຍໃຈວ່າ ພວກເຮົາ­ຈະ­ສາມາດເຮັດ­ສໍາເລັດຫນ້າ­ທີ່­ອັນ­ຍິ່ງໃຫຍ່ ໃນພາ­ລະ­ກິດປົກປັກຮັກສາ ແລະ ສ້າງ­ສາ­ພັດທະ­ນາ­ປະ­ເທດ­ຊາດ­ຂອງ­ພວກເຮົາໄດ້ຢ່າງ­ມີໄຊ.

ພັກປະ­ຊາ­ຊົນປະ­ຕິວັດ­ລາວ ທີ່­ມີກຽດສະ­ຫງ່າ­ຫມັ້ນ­ຍືນ !

(ຂອບໃຈທີ່ອ່ານ-ຂອບໃຈພາບໄດ້ຈາກອິນເຕີເນັທ)

ສາວໝໍລຳສີພັນດອນ, ລຳໂສມ....ແຫ່ງເມືອງໂພນທອງ...

ຈັ່ງວ່າຟ້າເອີຍຟ້າ ເຈົ້າຜູ້ຟ້າຕັ້ງໂງ່ນ ເບິ່ງໝໍລຳຜູ້ຊາຍ ສັງມານັ່ງໂຈ່ນໂປ່ນ ພໍປານໝາກຫອຍດົງ ເບິ່ງເປັນງອນໆງົງໆ ຂີ້ໃສ່ສົ້ງແລ້ວບໍ...ໝໍລຳອ້າຍ.....

ເຊື່ອບໍ່....ສາວໃຕ້ຄົນນີ້ໃຈດີ ມີນ້ຳສຽງເສາະໃສ ລຳໄດ້ທັງສີພັນດອນ, ຄອນສະຫວັນ, ສາລະວັນ, ຂັບທຸ້ມ, ຮ້ອງເພງ, ລຳຊິ້ງ ແລະ ອື່ນໆ ຈົນເວົ້າໄດ້ວ່າ ຕາມໃຈເຈົ້າພາບທີ່ສັ່ງ....ນັ່ງລຳໝົດຄືນ, ຢືນ ຫລື ເຕັ້ນ ກໍບໍ່ເຄີຍວ່າ....

(ເພິ່ນວ່າ ບ້ານຄັນແຍງ ບ້ານຂອງໝໍລຳອິນແຕ່ງນີ້ເປັນບ້ານໝໍລຳ)

...ຖ້າຢາກຮູ້ເລື່ອງລາວຂອງ ສາວໝໍລຳອິນແຕ່ງ ແກ້ວບົວລາ....

 ກົດບ່ອນນີ້ໄວໆ

(ຂອບໃຈຫລາຍໆ)

ການໃຫ້ຄືບໍ່ເກີດແຫ່ງຄວາມສຸກ

ດ້ວຍຄວາມໄວ້ວາງໃຈ “ຄະນະລະຄອນສຽງແຄນລາວ” ຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດລາວເຫັນດີ ແລະ ໄດ້ມອບໜ້າທີ່ປະສານງານຫລັກໃນວຽກ ງານການກຸສົນເພື່ອຊ່ວຍປະຊາຊົນຜູ້ທຸກຍາກ 2014 ໃຫ້ ແລະ ຂໍສະແດງຄວາມຂອບໃຈມາຍັງພາກ ສ່ວນ,ບໍລິສັດ ແລະ ບຸກຄົນທີ່ໄດ້ປະກອບສ່ວນເປັນວັດຖຸ ແລະ ເງິນຄຳ ດ້ວຍນ້ຳໃຈເສຍ ສະຫລະອັນສູງສົ່ງຜ່ານ “ຄະນະລະຄອນສຽງແຄນລາວ” ຂອງວິທະຍຸກະຈາຍສຽງແຫ່ງຊາດລາວ ເພື່ອນຳໄປມອບໃຫ້ພີ່ນ້ອງຮ່ວມຊາດທີ່ຍັງທຸກຍາກຂາດເຂີນ. ການປະຕິບັດກິດຈະ ກຳການກຸສົນເພື່ອປະຊາຊົນຜູ້ທຸກຍາກ ຂອງວິທະຍຸກະຈາຍສຽງແຫ່ງຊາດລາວນີ້ໄດ້ດຳເນີນມາຄົບ 10 ປີພໍດີ.

ຄັ້ງນີ້ ອາດຈະມີຄວາມຊັກຊ້າໃນການນຳເອົາເຄື່ອງບໍລິຈາກຂອງພວກທ່ານໄປເຖິງປະຊາຊົນເລົ່ານັ້ນເນື່ອງຈາກວ່າ ປີນີ້ ໃນນາມທີ່ພວກເຮົາເປັນອົງການສື່ ເຊິ່ງເປັນ ກະບອກສຽງຂອງພັກ ພວກເຮົາມີຫລາຍວຽກທີ່ໜັກໜ່ວງ ເພາະປີນີ້ພວກເຮົາໄດ້ສຸມໃສ່ການໂຄສະນາໃຫ້ແກ່ 2 ວັນປະຫວັດສາດຂອງຊາດ ຄື: ວັນສ້າງຕັ້ງພັກປະຊາຊົນປະຕິ ວັດລາວ ຄົບ ຮອບ 60 ປີ ແລະ ວັນສະຖາປານາສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ…ແຕ່ເຖິງແນວໃດກໍຕາມ ການດຳເນີນກິດຈະກຳການກຸສົນ ກໍແມ່ນສ່ວນໜຶ່ງ ໃນການຕອບສະ ໜອງນະໂຍບາຍຂອງພັກ ແລະ ລັດຖະບານ ໃນການຫລຸດຜ່ອນຄວາມທຸກຍາກຂອງ ປະຊາຊົນລາວ. ໃນນາມ ວິທະຍຸກະຈາຍສຽງແຫ່ງຊາດລາວ ຂໍສະແດງຄວມຂອບໃຈໃນທຸກການມີສ່ວນຮ່ວມຂອງພວກທ່ານ ແລະ ຫວັງວ່າຄົງໄດ້ຮັບການຮ່ວມຕື່ມອີກໃນຄັ້ງຕໍ່ໄປ…ດ້ວຍຄວາມຮັກແພງ ແລະ ຮູ້ບຸນຄຸນເປັນຢ່າງສູງ…

ລາຍລະອຽດຕິດຕາມອ່ານໄດ້ລຸ່ມນີ້

ກົດໄວໆ ບ່ອນນີ້ລະ

ຂອບໃຈທີ່ຕິດຕາມ

ເຈົ້າຂອງບົດປະພັນນີ້ຢູ່ໃສ ໃຜມີຄຳຕອບ

ເຮົາມີປະຫວັດກ່ຽວກັບນັກປະະພັນລະຄອນວິທະຍຸ ທີ່ໃຊ້ຊື່ ແລະ ນາມປາກກາວ່າ: " ເທບທາລາ ຫລື ເທບທາຣາ " ພຽງໜ້ອຍດຽວ ແຕ່ຫລາຍຄົນພັດເຄີຍຟັງຜົນງານຂອງເຂົາຈົນຕິດອົກຕິດໃຈ....ໃຜມີຄຳຕອບໃຫ້ໄດ້ແດ່ນໍ້ ວ່າດຽວນີ້ ເທບທາລາ ຢູ່ໃສ ເຮັດຫຍັງ ? ແລະ ມີໃຜແດ່ທີ່ຈຳຊື່ບົດລະຄອນຂອງເຂົາໄດ້...

ຂອບໃຈພາບປະກອບພາບນີ້ຈາກເພື່ອນມິດໃນເຟຊບຸກ

ຈຳນວນບົດລະຄອນຂອງເທບທາລາທີ່ຊອກເຫັນໃນສາງເທັບ ວສລ

ຢາກຮູ້ຈັກເລື່ອງລາວຂອງນັກປະພັນລະຄອນທ່ານນີ້

ກົດອ່ານໄວໆ

(ຂອບໃຈ)

ຄົນລາວເປັນຄົນເອື້ອເຟື້ອເພື່ອແພ່

ໃນນາມລະຄອນສຽງແຄນລາວ ວິທະຍຸກະຈາຍສຽງແຫ່ງຊາດລາວ ຂໍສະແດງຄວາມຂອບໃຈ ມາຍັງຄະນະບໍລິຫານສູນລວມຄຣິສຕະຈັກຂ່າວປະເສີດ ແຫ່ງ ສປປ ລາວ ທີ່ໄດ້ຮ່ວມບໍລິຈາກເຄື່ອງນຸ່ງຫົ່ມ ຈຳນວນ 20 ຖົງ ເຊິ່ງປະກອບມີເຄື່ອງສຳລັບເດັກ ແລະ ຜູ້ໃຫຍ່ ຈຳນວນ 1,800 ຜືນ ລວມມູນຄ່າເກືອບ 15,000,000 ກີບ (ມອບ ວັນທີ 27 ພະຈິກ 2014).

ເຄື່ອງຈຳນວນນີ້ແມ່ນໄດ້ມອບເຂົ້າໃນໂຄງການຕ້ານໄພໜາວປະຈຳປີ 2014 ຂອງຄະນະລະຄອນສຽງແຄນລາວ(ວສລ) ເພື່ອນຳໄປມອບແກ່ປະຊາຊົນທີ່ທຸກຍາກທີ່ຢູ່ຊົນນະບົດ ໃນເຂດຫ່າງໄກສອກຫລີກ.

ຜູ້ອຳນວຍການໃຫຍ່ ວສລ ທ່ານສີພາ ນົງລາດ ມາຮ່ວມຮັບເຄື່ອງບໍລິຈາກ

ເຄື່ອງດັ່ງກ່າວ ແມ່ນໄດ້ຮັບມາຈາກການຖວາຍດ້ວຍນ້ຳຈິດນ້ຳໃຈ ແລະ ດ້ວຍການໃຫ້ດ້ວຍຄວາມບໍລິສຸດຂອງຊາວສານິກະຊົນໃນສູນລວມຄຣິດຕະຈັກຂ່າວປະເສີດ ເພື່ອປະກອບສ່ວນເຂົ້າໃນການ ພັດທະນາປະເທດຊາດໃຫ້ຈະເລີນຮຸ່ງເຮືອງ, ປະກອບສ່ວນເຂົ້າໃນວຽກງານການຫລຸດຜ່ອນຄວາມທຸກຍາກຕາມທິດທາງນະໂຍບາຍຂອງພັກ ແລະ ລັດຖະບານ ແຫ່ງ ສປປ ລາວ.

ໃນນາມຄະນະລະຄອນສຽງແຄນລາວ(ວສລ) ຂໍສະແດງຄວາມຂອບໃຈ ແລະ ອວຍພອນແດ່ຄະນະບໍລິຫານສູນລວມຄຣິສຕະຈັກຂ່າວປະເສີດ ແຫ່ງ ສປປ ລາວ, ຊາວສານິກະຊົນໃນສູນລວມຄຣິດຕະຈັກຂ່າວປະເສີດ ທຸກທ່ານ ພ້ອມຄອບຄົວ ແລະ ຄົນທີ່ທ່ານຮັກ ຈົ່ງປະສົບແຕ່ຄວາມຈະເລີນ ມີ ອາຍຸ ວັນນະ ສຸຂະ ພະລະ....ເທີ້ນ

ໃນໄລຍະດຽວກັນນັ້ນ ພວກເຮົາກໍໄດ້ຮັບການບໍລິຈາກປຶ້ມອ່ານ ຈາກຫໍສະໝຸດແຫ່ງຊາດ ຈຳນວນ 23 ລາຍການ ມີມູນຄ່າເກືອບ 9,000,000 ກີບ.

ຂໍສະແດງຄວາມຂອບໃຈຄະນະອຳນວຍການ ແລະ ພະນັກງານຫໍສະໝຸດແຫ່ງຊາດທຸກໆທ່ານ ຂໍໃຫ້ທຸກໆທ່ານມີສຸຂະພາບແຂງແຮງ ແລະ ໂຊກດີມີໄຊ...

ຂອບໃຈທີ່ຕິດຕາມ

ເຊີນຮ່ວມບໍລິຈາກໄດ້ທີ່ ວິທະຍຸກະຈາຍສຽງແຫ່ງຊາດລາວ

ໂທຣ: 030-5787052(ເວລາລັດຖະການ), 020-55338863

(ການເດີນທາງໄປມອບເຄື່ອງ ງວດທຳອິດ ຕົ້ນເດືອນ ມັງກອນ 2015 ທີ່ ເຂດພັດທະນາເມືອງປາ-ຜາລຽບ ເມືອງປາກລາຍ ແຂວງໄຊຍະບູລີ)